Tea Kummen

Lærar og barnebokforfattar. På ein nokså markant måte braut ho med kjønns- og alderskonvensjonar i si samtid, mellom anna ved at ho tok snikkarutdanning da ho var 60 år gammal.

Fagutdanninga fekk Kummen ved lærarskulen på Hamar og med eit års vidareutdanning på Noregs lærarhøgskule. Fyrste lærarstillinga si hadde ho i Fåberg i 1915. Deretter var ho tilsett ved Marlo skule i Skjåk frå 1916 til 1944. Ho underviste mest i småskulen på 3. og 4. klassetrinn.

Den fyrste barneboka, Villvuru, kom ut i 1931. Deretter kom Den blå bringeduken (1933), og sidan Villveng (1947) og Tonen frå blåtaket (1968). Kummen skreiv elles mykje i Norsk barneblad. For vaksne skreiv ho ein del lokal- og kulturhistoriske stykke, mellom anna i Årbok for Gudbrandsdalen.

Kummen var ei ihuga talskvinne for målsaka og engasjerte seg for likestillingsspørsmål.